اڑان نیوز
اودھم پور//چیف سیکرٹری بی بی ویاس نے متعلقہ افسروں پر زور دیا ہے کہ وہ مختلف ترقیاتی کاموں کی بروقت تکمیل کو یقینی بنانے اور ریاست میں دستیاب وسائل کو منصفانہ ڈھنگ سے استعمال میںلانے کے لئے ایک روڑ میپ تیار کریں۔چیف سیکرٹری نے ادھمپور میں ترقیاتی منظرنامے کا افسروں کی ایک میٹنگ کے دوران جائزہ لیتے ہوئے کہا کہ کاموں کو ترجیحات میں شامل کیا جانا چاہیئے اور رکاوٹوں کو دور کر کے کاموں کو ایک معیاد بند مدت کے اندر مکمل کیا جاناچاہیئے۔پرنسپل سیکرٹری داخلہ آر کے گوئیل ، ڈویژنل کمشنر جموں ڈاکٹر مندیپ کے بھنڈاری ، ڈی سی ادھمپور رویند کمار ، ایس ایس پی رئیس احمد بٹ کے علاوہ مختلف محکموں کے افسران بھی موجود تھے۔میٹنگ کے دوران چننئی ۔پتنی ٹاپ سڑک ، ار ا کی طرف پائیپ لائن بچھانے ، ریڈیو سٹیشن کے لئے حصول اراضی ، 135کے وی ترسیلی لائن کو منتقل کرنے اور دیویکا رور کنزرویشن پروجیکٹ پر تفصیل سے غور و خوض کیا گیا ۔چیف سیکرٹری نے کہا کہ پروجیکٹوں کی عمل آوری میں تاخیر سے نہ صرف اخراجات میں اضافہ ہوتا ہے بلکہ لوگ ترقیاتی سکیموں سے استفادہ بھی نہیں کر پاتے ہیں۔انہوں نے کہاکہ متعلقہ محکموں کو باہمی اشتراک کے ساتھ کام کر کے تمام رکاوٹوں کو دور کرنا چاہیئے۔اس سے قبل چیف سیکرٹری نے شاہراہ کی حالت ، سرماکی تیاریوں ، ترقیاتی منظرنامے ، شاہراہ کو وسعت دینے ، ریل پروجیکٹ اور اننت ناگ میں دیگر کئی کاموں کا تفصیل سے جائزہ لیا تھا۔انہوں نے سرینگر سے جموں کی طرف سفر کرتے ہوئے 11گھنٹوں کے دوران ویسو ، قاضی ، بانہال اور رام بن میں بھی مختلف پروجیکٹوں اور سہولیات کا جائزہ لیا۔